జర్నలిస్టు మహమ్మద్ ఫహీమ్‌కు రూ.50 లక్షల పరువు నష్ట పరిహారం లీగల్ నోటీసు

జె.హెచ్.9.మీడియా, భద్రాద్రికొత్తగూడెం: తన ప్రతిష్ఠకు భంగం కలిగించేలా నిరాధార ఆరోపణలు చేస్తూ, వాటిని ఇతరులకు ప్రచారం చేస్తున్నారనే ఆరోపణలతో జర్నలిస్టు మహమ్మద్ ఫహీమ్‌కు కొత్తగూడెం పట్టణానికి చెందిన ప్రముఖ వ్యాపారి, సామాజిక, మతపరమైన సేవా కార్యక్రమాల్లో చురుకుగా పాల్గొనే మహమ్మద్ మస్తాన్ (72) తన న్యాయవాదుల ద్వారా లీగల్ నోటీసు జారీ చేయించారు.

తెలంగాణ రాష్ట్ర వక్ఫ్ బోర్డు చీఫ్ ఎగ్జిక్యూటివ్ ఆఫీసర్‌కు మహమ్మద్ ఫహీమ్ ఫిర్యాదు చేస్తూ, మహమ్మద్ మస్తాన్‌పై వక్ఫ్ ఆస్తులు, నిధుల దుర్వినియోగం, అవినీతికి సంబంధించిన ఆరోపణలు చేసినట్లు న్యాయ నోటీసులో పేర్కొన్నారు.

ఈ ఫిర్యాదుపై స్పందించిన వక్ఫ్ బోర్డు అధికారులు మహమ్మద్ మస్తాన్‌ను వివరణ కోరగా, ఆయన తన వివరణ సమర్పించడంతో పాటు ఆరోపణలకు సంబంధించిన నిర్దిష్ట ఆధారాలను అందించాలని కోరినట్లు నోటీసులో వివరించారు. అనంతరం ఆరోపణలకు మద్దతుగా ఆధారాలు, సంబంధిత పత్రాలు సమర్పించాలని ఫిర్యాదుదారుడికి ఏడు రోజుల గడువు ఇస్తూ అధికారులు నోటీసు జారీ చేసినట్లు పేర్కొన్నారు. అయితే, తమకు అందుబాటులో ఉన్న సమాచారం ప్రకారం ఆ గడువులోగా సంబంధిత ఆధారాలు సమర్పించలేదని మహమ్మద్ మస్తాన్ తరఫు న్యాయవాదులు నోటీసులో పేర్కొన్నారు.

అయినప్పటికీ తనపై చేసిన ఆరోపణలను వివిధ వ్యక్తుల వద్ద ప్రచారం చేస్తూ, తన సామాజిక గౌరవ మర్యాదలకు, వ్యక్తిగత ప్రతిష్ఠకు భంగం కలిగిస్తున్నారని మహమ్మద్ మస్తాన్ ఆరోపించారు.

ఈ నేపథ్యంలో న్యాయవాదులు ఎం.డి. సాదిక్ పాషా, డి. సామంత్ కార్యాలయం ద్వారా మహమ్మద్ ఫహీమ్‌కు లీగల్ నోటీసు పంపించారు. తప్పుడు, నిరాధార ఆరోపణల ప్రచారాన్ని తక్షణమే నిలిపివేయాలని, ఏడు రోజుల్లోగా బహిరంగంగా, బేషరతుగా క్షమాపణ చెప్పాలని, గతంలో చేసిన ఆరోపణలను ఉపసంహరించుకోవాలని నోటీసులో డిమాండ్ చేశారు. భవిష్యత్తులోనూ ఇటువంటి ఆరోపణలు చేయకుండా ఉండాలని స్పష్టం చేశారు.

అదేవిధంగా, తనకు కలిగిన పరువు నష్టం, మానసిక వేదన, సామాజిక అవమానానికి పరిహారంగా రూ.50,00,000 (యాభై లక్షల రూపాయలు) చెల్లించాలని నోటీసు ద్వారా కోరారు.

నిర్దేశించిన గడువులోగా నోటీసులోని డిమాండ్లను నెరవేర్చకపోతే, తదుపరి నోటీసు లేకుండానే సంబంధిత న్యాయస్థానాన్ని ఆశ్రయించి సివిల్, క్రిమినల్ చట్టపరమైన చర్యలు చేపడతామని హెచ్చరించారు. భారతీయ న్యాయ సంహిత (BNS), 2023లోని సెక్షన్ 356 కింద అందుబాటులో ఉన్న చట్టపరమైన పరిహారాలను కూడా ఆశ్రయిస్తామని మహమ్మద్ మస్తాన్ తరఫు న్యాయవాదులు నోటీసులో పేర్కొన్నారు.

వ్యక్తుల గౌరవ మర్యాదలు, ప్రతిష్ఠకు భంగం కలిగించేలా నిరాధార ఆరోపణలు చేయడం, వాటిని ధృవీకరించకుండా ప్రచారం చేయడం చట్టపరమైన పరిణామాలకు దారితీయవచ్చని న్యాయవాదులు ఎం.డి. సాదిక్ పాషా, డి. సామంత్ ఈ సందర్భంగా పేర్కొన్నారు.